Lès vîs batumints ***
Li tchèstê d' Ritchèle
On l’ troûve å mitan dè viyèdje. Ci n’ èst nin on tchèstê po d’ bon mins pus vite ine bèle grosse vîle mohone qu’ on n’ såreût dîre å djusse qwand èlle a stu fête.
Avou lès annèyes, èlle a broûlé, on-zî a candjî bramint dès afères po î bin viker èt asteûre, èle fêt pårtèye dès bins dèl famile Smette.
Li Coûr di Djustice
On l’ pout trover so l’ plèce dè viyèdje, tot près d’ l’ èglîse. Å dih-ûtinme siéke, c’èsteût l’ mohone d’ Odémont ou Dodémont, ine famile qu’a d’né dès mayeûrs, dès borguimêsses èt saqwantès hôtès djins.
En 1745, li batiheû foûrit JeanMathias Dodémont, qui rintréve li manôye po l’ payis d’ Dålèm dè timps dès Ôtrichiens. Ènn’ a dès cis qui d’hèt qu’ åreût djusse fêt fé li pwèrtå èt mètou d’sus s’ blazon èt l’ ci di s’ feume, manîre dè mostrer quî qu’èsteût ; ca, c’ pwèrtåla, èclawé d’vins on meûr di grîsès pîres, avise « racrotchî » a tot l’ ôte rèsse dèl mohone.
C’èst la qu’ on-z-a rindou l’ djustice a Ritchèle disqu’a l’ rèvoluchon francèse.
Li Cour d'Aix
On n’a wère di racsègnemints so c’ batumint-la. Totes sès pårtèyes sont adjinc’nèyes åtoû d’ ine cwårèye coûr å mitan dè vî viyèdje.
C ’èst la, sonl’reût-i, qu’on rindéve li djustice divant qu’ Mathias Dodémont dècidahe qu’ on f’reût çoula è s’ batumint dè Trîhe.
Qwand on-z-î pout intrer, on troûve co todi dès rèsses di çou qu’ åreût polou èsse in-åté avou lès lètes dè no d’ l’ Avièrge Marèye ; mutwè èsteût-ce ine tchapèle, ou bin ine plèce, la qu’ inèskèvin ovréve.
Dès ôtes sincieux ont è l’ îdèye qui c’ èsteût tél’fèye li mohone d’ on « Vouwé », ca, so l’ pwèrtå, on veût ine dåte : 1671. Mins, so l’ pîre d’ in-ôte meûr, èco ine dåte, 1575, qui mosteûre bin qu’sakwant’ bokèts sont co pus vîs.
Ènn’ a bramint ossu qu’ont stu arindjîs a l’ novèle môde, (èco on pwèrtå, cila di 1717) ; on-z-î veût li blazon dèl famile Van Zuylen, qu’a rètch’té l’ batumint èt tos lès bins da FrançwèsDjôsèf di Mercy Ardjètè an 1903.
Li cinse a co candjî d’ mins an 1985 (famile Lehaene-Houbrechts), èt, an 2001, ine novèle cope, Paul Debey èt Yolande Lippertz, ont r’fèt tot a noû mins sins rin candjî a l’istwére dès vîs meûrs
Di nos djoûs, c’ èst div’nou ine sôrt d’ ôtél, avou dès tchambes a l’ campagne, come on ‘nnè veût bêcôp, la qu’ on s’ pout r’pwèser ou bin s’ porminer påhûlemint ; ou minme si rescontrer inte djins d’ minme mèstî po s’ diner onk a l’ ôte dès novèlèsîdèyes.
L'èglîse
Li porotche di Ritchèle a vèyou l’ djoû en 1287, avou l’ privot d’ Åhe, Walrame di Juliers. Di c’ timps-la, i n’ aveût qu’ine pitite tchapèle. On-z-a bin r’trové dès foûs vîs papîs qui djåsît dèdja d’ ine èglîse mins on n’ a måy rin polou mète a djoû.
L’ èglîse qui nos k’nohans a stu fête a pårti d’ 1777. C’èsteût on fwért batumint d’ brikes avou ine toûr di treûs ostèdjes èt ‘ne flèche a ût costés, mins on l’ a d’vou r’fé an 1942 cåse dè l’ guére. C’ èst l’ baron Joseph Van Zuylen (li popa d’ l’èvêke) qu’a miné lès ovrèdjes po fé ovrer lès omes di Ritchèle, qui insi, n’ èstît nin r’pris po l’ STO è l’ Al’magne.
Èlle a ine nåve di treûs pårtèyes èt li loumîre inteûre vè lès veûlîres.
Si vos ‘nnè volez savu pus’ so l’ keûr èt so l’ èglîse, i våt mî dè lére li francès… !
Si on vout èsse ôgnesse, i fåt bin rik’nohe qu’ i-n-a dès saqwès qu’ on n’ såreût dîre è walon…
… ou qu’ ènnè valèt nin lès ponnes…
Lès Al’mands ont hapé lès treûs clokes dè timps d’ guére èt on l’-z-a fêt r’fé an 1955.
A hintche, å p’tit åté, on veût l’ Avièrge dèl porcèchon èt sès deûs bèlès mousseûres po lès fièsses.
A dreûte, on veût l’ posteûre di SintFirmin, qui r’monte å moumint qu’ l’ èglîse a stu fête.
Tot près d’ l’ intrèye, a dreûte, lès fonts batismåls, avou leû coûv’lå sbatou è marbe di Sint-R’mèy (dè costé d’ Rotch’fôrt) å 17inme siéke.
Bin catchèye è cou d’ l’ èglîse, on pout vèyî ine ôte pitite posteûre di bwès qui r’monte å 15inme siéke.Èle mosteûre ossu Sint-Firmin, sint patron dèl porotche. I-n-a dès djins qui v’nèt d’ bin long po vèyî ç’ sint-la.
C’ èst J. M. Molingen qu’a mètou è plèce li fwért bê ôr di l’ èglîse, an 1855. Franz Liszt s’ènn’a chèrvou co traze côps, qwand c’èst qu’i v’néve ènArdjètè po rèscontrer li contèsse di Mercy d’ Ardjètè èt lès feûs d’ musike vinous d’ Russîye.
Li tchapèle di Nostru-Dame å Bois d'Argenteau
Cisse fwért bèle tchapèle èst pièrdowe è bwès, dizeû l’ valêye dèl Djulène, so l’ tére d’ Ardjètè. Èle féve pårtèye dèl porotche di Ritchèle.
On-z-î va po Sint-R’mèye.
An 1683, i n’ aveût co nole tchapèle, mins lès djins î fît dèdja dès ôrémus’, ca, sôrlon dès racont’roûles, ine målureûse åreût trové ine pitite posteûre di l’ Avièrge è coûr d’on vî tchinne. Come l’êwe dèl fontinne èsteût rik’nohowe po adoûci lès mås d’ oûy, c’èsteût l’ plèce a l’ îdèye po lès priyîres èt lès pèlerinèdjes.
An 1749, li p’tit oratwére div’na ‘ne tchapèle, avou on lodjis’ po l’ tchap’lin. On l’ louma « Hèrmitèdje di Wihou ». Li Marquîse di Laverne trova lès çanses po-z-intruteni li batumint èt l’ ome qui î chèrvéve.
Dès annèyes pus tård, li tchapèle passa è l’ famile di Mercy-Ardjètè, èt l’ comte Françwès ripègn’ta lès meûrs è 1849. I lèya minme si no so on marbe, tot près d’ l’ åté.
I fåt prinde lès ponnes d’aller vèyî cisse pitite tchapèle-la èt d’ î hoûter l’ ôr, a l’ocåsion d’ ine fièsse ou l’ ôte.